تەنگه نەفەسی

هه‌ر كه‌ نیگامان له‌سه‌ر تابووته‌كه‌ وه‌رده‌گێڕا، ده‌گه‌یشتینە‌ ده‌ستێكی سه‌ماكه‌ری نێو با. تابووته‌كان و مه‌رگه‌كان دووباره‌ ده‌بوونه‌وه‌، ئه‌نفال و هه‌ڵه‌بجه‌ و سه‌رده‌شت و بانه و زه‌رده‌ دووباره‌ ده‌بوونه‌وه‌. ده‌یه‌ی هه‌شتاكان دووباره‌ ده‌بوونه‌‌وه‌. ئێمه‌ له‌ زیندووه‌كان بووین. ئێمه‌ له‌ مردووه‌كان بووین. كازیوه‌ی سێداره ‌و كوشتار بووین. ده‌نگی ساز و ده‌هۆڵ ده‌هات. ده‌نگی شادی هه‌ی شادی و جیكه‌جیكی چۆله‌كه‌ كیمیاوی لێدراوه‌كانمان ده‌بیست. ژنه سه‌ڵته‌ پۆش و كه‌وا پۆشه‌كانمان ده‌دی. ڕه‌نگاوڕه‌نگ بوون. سه‌ماكه‌ربوون…
ده‌نگی هه‌ڵهه‌ڵه‌ و شاباش ده‌هات، ده‌نگی ته‌نبوور و کەڵام فانی فانی و هەێ گیان هەێ گیان. په‌ژاره‌كان و كابوسه‌كان و خه‌رمانه‌ پیرۆزه‌كان به‌دوایەکدا ده‌هاتن، شایی و پرسه‌ ده‌گێڕدرا.